Sterkust í 10. umferð - Klárar hún tímabilið á Íslandi?

„Lék á als oddi og var á góðri íslensku gjörsamlega unplayable," skrifaði Elíza Gígja Ómarsdóttir í skýrslu sinni frá leiknum.

„Skorar þrennu á fjórum mínútum í fyrri hálfleik og bætir við tveimur í viðbót í þeim seinni. Er orðuð við atvinnumennsku þessa dagana en það er bara spurning um hvenær en ekki hvort hún fer út.

Ída Marín hefur átt frábært sumar með FH og er núna markahæsti leikmaður Bestu deildarinnar með átta mörk. Hún er undir smásjá margra félaga erlendis og spurning er hvort hún klári tímabilið með FH.

„Ég er með frelsi til að vera ég sem leikmaður hvar sem það er á vellinum. Þó að ég sé í tíunni eða sexunni, þeir bara treysta mér að klára mitt verkefni og já, bara geggjaðar stelpur, geggjaðir þjálfarar," sagði Ída Marín eftir leikinn gegn Þrótti en hún vildi ekkert tjá sig um það hvort hún væri á leið út.

Það er meðal annars áhugi á henni frá Bandaríkjunum og Spáni en spennandi verður að sjá hvert hennar næsta skref verður á ferlinum.