Átti sinn besta leik til þessa gegn gömlu félögunum - „Ótrúleg stemning"

„Lykillinn var að halda trúnni, við höfum verið að vinna marga leiki, höfum gefið okkur alla í leikina og í dag var þetta eins; vildum gefa allt í þetta frá fyrstu mínútu. Við gerðum það og núna erum við með stigin þrjú."

Rafael kom til Þórs frá Njarðvík eftir tímabilið 2023. Kveikti það meira í honum að mæta sínum fyrrum liðsfélögum?

„Nei, í rauninni ekki. Ég var bara að hugsa um að vinna, því með sigri færum við á toppinn og þyrftum bara að treysta á okkur sjálfa. Ég var bara einbeittur á að hjálpa liðinu að vinna."

Rafael átti sinn besta leik í langan tíma í dag, í það minnsta hans besti leikur á þessu tímabili. Hann missti af byrjun mótsins vegna meiðsla en hefur í síðustu 3-4 leikjum verið alveg 100%.

„Við erum á góðum stað, ég er mjög ánægður og núna er þetta undir okkur komið. Við verðum að vera auðmjúkir, gefa okkur alla í alla leikina."

Rafael spilar sem fremsti maður og vinstra megin við hann hefur Sigfús Fannar Gunnarsson raðað inn mörkum. Sigfús hefur skorað tólf mörk í deildinni á tímabilinu.

„Það er mjög gott að spila með honum, hann er betri í ár en í fyrra, spilar með sjálfstrausti, hann er snöggur og öflugur þegar hann fer af stað með boltann."

Portúgalinn var spurður út í markið sem hann skoraði, það myndaðist stórt gat í vörn Njarðvíkur þar sem varnarmaður þeirra lá eftir, og framherjinn nýtti sér það gat.

„Ég tók ekki eftir því að hann var í grasinu, ég vildi bara fá boltann, sá markið og vildi skora. Það er vinnan mín."

„Stuðningurinn í dag hafði áhrif, ótrúleg stemning, mjög góður stuðningur og ég vona að þetta verði eins í síðustu þremur leikjunum," sagði markaskorarinn.