Ísland var dregið síðast úr þriðja styrkleikaflokki en ef liðið hefði komið upp úr kúlunni á undan þá hefði liðið okkar verið í dauðariðli með Frakklandi, Englandi og Írlandi.

Í staðinn fáum við Þýskaland sem var þriðja besta liðið í efsta styrkleikaflokki samkvæmt styrkleikalista FIFA, Austurríki sem er slakasta liðið í öðrum styrkleikaflokki og Pólland sem er slakasta liðið í fjórða styrkleikaflokki. Þetta er auðvitað erfiður riðill þar sem við erum í A-deild en möguleikarnir eru svo sannarlega góðir á að fara beint á mótið.

Ísland er fyrir ofan Austurríki á styrkleikalista FIFA; Ísland er í 15. sæti og Austurríki er í 17. sæti.

Styrkleikaflokkarnir réðust af stöðu liðanna í Þjóðadeildinni. Því var Ísland í þriðja styrkleikaflokki.

1. styrkleikaflokkur
Spánn (1. sæti á styrkleikalista FIFA)
Frakkland (3. sæti)
Þýskaland (6. sæti)
Holland (7. sæti)

2. styrkleikaflokkur
England (4. sæti)
Danmörk (13. sæti)
Ítalía (14. sæti)
Austurríki (17. sæti)

3. styrkleikaflokkur
Svíþjóð (5. sæti)
Ísland (15. sæti)
Noregur (16. sæti)
Belgía (18. sæti)

4. styrkleikaflokkur
Írland (24. sæti)
Finnland (27. sæti)
Tékkland (28. sæti)
Pólland (29. sæti)

Með því að enda í efsta eða öðru sæti í riðlinum í undankeppninni fer Ísland beint á EM og möguleikarnir eru svo sannarlega til staðar þar sem við lentum í góðum riðli. Ef við förum ekki beint á mótið þá förum við í umspil gegn liði úr C-deild og svo gegn liði úr B-deild ef við komumst í gegnum fyrsta umspilið.

Leikdagar í undankeppni EM:
Leikdagar eitt & tvö: 3. - 9. apríl
Leikdagar þrjú & fjögur: 29. maí - 4. júní
Leikdagar fimm & sex: 10. - 16. júlí
Umspil eitt: 23. - 29. október
Umspil tvö: 27. nóvember - 3. desember