„Ég er mjög svekktur að hafa ekki tekið öll þrjú stigin. Mér fannst við eiga það skilið, spilamennskan og frammistaðan var á því kaliberi að þrjú stig finnst mér sanngjarnt," sagði Sigurvin Ólafsson, þjálfari Þróttar, eftir jafntefli liðsins gegn Völsungi á Húsavík í dag.
Lestu um leikinn: Völsungur 2 - 2 Þróttur R.
„Þetta er þolinmæðisverk, við fengum ekki mikið af færum í fyrri hálfleik. Við vorum örugglega með boltann 80% en það fannst mér byrja að skila sér í seinni hálfleik. Völsungur orðnir þreyttir á að eltast við okkur. Því miður í þessi fáu skipti sem þeir skutust upp náðu þeir að búa til tvö mörk."
Venni taldi að seinna mark Völsung hafi verið ólöglegt.
„Ég er svekktastur með þetta jöfnunarmark í þessum leik sem ég held að sé gjörsamlega kolólöglegt. Það svíður ennþá meira að vera 2-1 yfir og fá á sig þetta mark þar sem var augljóslega brotið á Eiríki í aðdraganda marksins, undarlegt að dómarinn skildi ekki flauta á það," sagði Venni.
Liam Daði Jeffs kom inn á í hálfleik fyrir Vilhjálm Kaldal Sigurðsson og skoraði bæði mörk Þróttar.
„Villi sem spilaði fyrri hálfleik á þátt í þessum tveimur mörkum. Hann var að tarfast í varnarmönnunum í fyrri hálfleik og náði að þreyta þá. Þá var frábært að geta sett eins góðan og ferskan leikmann inn á eins og Liam og svo Viktor aðeins seinna til að ganga frá þessu. Viktor átti síðan skot í stöng í stöðunni 2-2. Planið um að fá inn ferskar fætur til að klára leikinn gekk næstum því eftir," sagði Venni.
Athugasemdir
