Lestu um leikinn: Fjölnir 5 -  0 Leiknir R.

„Það var heldur betur ströggl og Fjölnisliðið var hrikalega sprækt og við áttum ekki breik," sagði Kristó að leikslokum.

„Þeir sýndu meiri hungur og vilja. Við vorum kannski ekki nógu mótiveraðir í þetta."

Kristó hrósaði ungu strákunum hjá Fjölni og sagðist þekkja til gæða þeirra af eigin reynslu frá tíma sínum hjá Fjölni fyrir fjórum árum.

Hann telur sig vanta nokkra leikmenn í hópinn eftir að hafa misst lykilmenn eftir síðasta tímabil.

„Staðan er svolítið snúin. VIð erum búnir að missa hrygginn okkar. Það er Dóri, Binni er væntanlega að fara til Færeyja, Raggi og Kolli. Þarna ertu með fjóra gaura sem spiluðu lungað af leikjunum í fyrra.

„Það sem pirrar mig mest er þetta Reykjavíkurmót. Við þurfum að vera með alla löglega á meðan við erum að horfa á liðin í kringum okkur taka gaura á prufur, sem er það sem við þyrftum að gera núna.

„Það er Ameríkani, hafsent, hjá okkur, það er að koma Dani á laugardaginn og það verður eitthvað meira, við þurfum að stækka aðeins hópinn hjá okkur. Hópurinn er mjög ungur eins og sást í dag, mikið af strákum sem eru jafnvel á fyrra ári í 2. flokk."

Brynjar Hlöðversson, lykilmaður hjá Leikni, mun líklega spila í Færeyjum næsta sumar og óskar Kristó honum góðs gengis. Brynjar er á leið til HB en Heimir Guðjónsson tók við liðinu í vetur.

„Það bendir allt til þess að hann sé að fara til Færeyja og ég get ekki annað en óskað honum góðs gengis þar. Stórkostlegur maður hann Binni Hlö."