Toni Kroos, miðjumaður Real Madrid og þýska landsliðsins, mun taka ákvörðun um framtíð sína á næstu mánuðum en hann greindi frá þessu í viðtali við TVE.
Þessi 34 ára gamli leikmaður verður samningslaus í sumar og hefur ekki enn tekið ákvörðun hvort hann ætli að vera áfram hjá Real Madrid eða fara annað.
Um helgina snéri hann aftur á völlinn með þýska landsliðinu eftir þriggja ára fjarveru og lagði meðal annars upp fyrsta markið í 2-0 sigri á Frakklandi.
Real Madrid er að gera sér vonir um að Kroos verði áfram í eitt tímabil til viðbótar.
„Ég mun ákveða framtíð mína í næsta mánuði eða eftir tvo mánuði, þá munum við sjá hvað gerist,“ sagði Kroos.
Kroos var einnig spurður út í mögulega komu Kylian Mbappe til félagsins.
„Mbappe? Við viljum alltaf hafa bestu leikmennina í Real Madrid og hann er einn af þeim. Ég veit hins vegar ekki hvað hann er búinn að ákveða,“ sagði Kroos enn fremur.
Athugasemdir