Giorgio Furlani, framkvæmdastjóri AC Milan, svaraði spurningum varðandi lykilmenn félagsins sem eru eftirsóttir af stórliðum víða um Evrópu.
Portúgalski kantmaðurinn Rafael Leao er samningsbundinn Milan þar til í júní 2028 og er hann ekki til sölu þrátt fyrir áhuga stórvelda.
„Rafael Leao er með söluákvæði sem hljóðar upp á 175 milljónir evra. Þar fyrir utan þá vill hann vera áfram hjá AC Milan, honum líður vel hérna. Hann segir það sjálfur," sagði Furlani í viðtali við La Gazzetta dello Sport áður en hann var spurður út í Mike Maignan og Theo Hernandez.
„Þeir eru báðir samningsbundnir félaginu þar til í júní 2026 en við vonumst til að halda þeim lengur. Þeir, eins og aðrir leikmenn, fá að ákveða sína framtíð sjálfir."
Furlani var að lokum spurður út í táninginn efnilega Francesco Camarda, sem er algjör lykilmaður í unglingaliði Milan og yngri landsliðum Ítalíu. Camarda er aðeins 16 ára gamall en er búinn að skora 16 mörk í 27 leikjum með U15, U16 og U17 landsliðum Ítalíu.
„Við erum að gera allt í okkar valdi til að halda honum innan okkar raða. Ég er viss um að hann vilji vera áfram hér."
Athugasemdir
