Á meðal félaga sem verkfallið hefur áhrif á er Grindavík sem vann sér sæti í Pepsi-deildinni á nýjan leik síðastliðið haust.

„Samningar við marga af okkar sterkustu aðila eru ófrágengnir. Þar á meðal er Lýsi sem við höfum verið í samstarfi við 33 ár. Þetta eru líka útgerðirnar og þjónustuaðilarnir í Reykjavík. Þetta er allt í bið en að öllu jöfnu er þetta frágengið um áramót," sagði Jónas Þórhallsson, formaður knattspyrnudeildar Grindavíkur við Fótbolta.net í dag.

Grindvíkingar hafa haft hægt um sig á leikmannamarkaðinum í vetur en Sam Hewson og Brynjar Ásgeir Guðmundsson komu til félagsins frá FH. Grindvíkingar hafa hins vegar misst fleiri leikmenn.

„Það eru átta farnir af launaskrá frá því á síðasta ári og við erum búnir að sækja tvo. Það segir meira en mörg orð Við erum með varann á. Við erum ábyrgir í þessu eins og við höfum alltaf gert. Við erum ekki komnir lengra en þetta."

Jónas vonast til að deilan fari að leysast þannig að hægt verði að styrkja hópinn meira fyrir keppni sumarsins í Pepsi-deildinni. „Við höfum reynt að finna gæði og gæði kosta. Við erum búnir að fá tvo stráka sem þekkja að vinna titla og við erum með einn Serba á reynslu núna. Hann hefur litið vel út en við höfum ekki getað gert neitt ennþá. Við viljum hafa allt á hreinu," sagði Jónas.