Karólína Lea Vilhjálmsdóttir var í byrjunarliði Bayer Leverkusen og átti góðan leik í 2-0 sigri gegn Köln í leik sem var að ljúka rétt í þessu.
Karólína lagði fyrra mark Leverkusen upp og hjálpaði liðinu þannig að krækja sér í góðan sigur.
Leverkusen er í fimmta sæti þýsku deildarinnar, sex stigum frá evrópusæti, og er Karólína mikilvægur hlekkur í byrjunarliðinu.
Í efstu deild norska boltans hafði Íslendingalið Vålerenga betur gegn Stabæk, en Íris nokkur Ómarsdóttir kom Stabæk yfir snemma leiks.
Íris er uppalin í Noregi og hefur verið í algjöru lykilhlutverki með yngri landsliðunum þar sem hún á 29 mörk í 41 leik. Íris er 20 ára framherji sem leikur fyrir U23 landslið Noregs í dag.
Stabæk leiddi 0-1 í leikhlé en Vålerenga tók öll völd á vellinum í síðari hálfleik. Hin 19 ára gamla Sædís Rún Heiðarsdóttir var í byrjunarliði heimakvenna og lagði hún upp þriðja markið í frábærri endurkomu í síðari hálfleik.
Þetta var fyrsti leikur Sædísar frá félagsskiptunum til Noregs og fer hún því afar vel af stað í sterkri deild.
Valerenga skóp þar með verðskuldaðan 3-1 sigur í áhugaverðum slag í fyrstu umferð nýs tímabils í Noregi.
Leverkusen 2 - 0 Köln
1-0 Lilla Turanyi ('23)
2-0 Kristin Kögel ('73)
Valerenga 3 - 1 Stabæk
0-1 Iris Omarsdottir ('3)
1-1 T. Bjelde ('52)
2-1 K. Sævik ('55)
3-1 J. Thomsen ('68)
Athugasemdir