8-liða úrslit Meistaradeildar kvenna hefjast í dag þegar hollensku risarnir í Ajax taka á móti stórveldi Chelsea, sem er ríkjandi Englandsmeistari.
Chelsea vann riðilinn sinn auðveldlega þar sem liðið fór taplaust í gegnum erfiða leiki gegn BK Häcken, Paris FC og Real Madrid.
Hacken gerði vel að komast upp úr riðlinum á kostnað Paris FC, sem mistókst að komast í útsláttarkeppnina eftir að hafa slegið stórveldi Arsenal og Wolfsburg úr leik í forkeppninni. Real Madrid endaði á botni riðilsins með eitt stig.
Ajax stóð sig stórkostlega í gríðarlega sterkum C-riðli og endaði í öðru sæti á markatölu. PSG vann riðilinn á markatölu á meðan stórveldi FC Bayern og AS Roma voru send heim.
Hér er því um stórleik að ræða í Amsterdam þar sem ekkert verður gefið eftir.
Í kvöld eru það Benfica og Lyon sem eigast við, en Lyon fór taplaust í gegnum B-riðilinn sem innihélt þægilega andstæðinga.
Benfica lenti í talsvert erfiðari riðli en tókst að komast áfram á kostnað Eintracht Frankfurt og Rosengård. Ríkjandi meistarar Barcelona unnu riðilinn auðveldlega.
Leikir dagsins:
17:45 Ajax - Chelsea
20:00 Benfica - Lyon
Athugasemdir