Hjartað sagði mér að koma hingað
Valur var í æfingaferð á Spáni á dögunum og hitti Gylfi liðið þar. Hann þekkti til hjá Valsmönnum eftir að hafa æft með liðinu á meðan hann var heima á Íslandi í fyrra. Síðan þá hefur Valur reynt að semja við hann en það tókst núna.

Af hverju er það Valur núna?

„Áhuginn frá þeim. Þeir gáfust ekki upp sem sýndi mér að þeir höfðu mikinn áhuga á að fá mig. Líka bara hópurinn, strákarnir hérna og þjálfararnir. Allt félagið í heild sinni hljómaði mjög vel og ég er ánægður að vera kominn."

Áður en hann samdi við Val þá reyndu önnur félög á Íslandi að klófesta hann. Víkingur gerði heiðarlega tilraun og þá hafði KR líka áhuga.

„Það voru einhver félög sem höfðu samband en ég ætla ekki að fara nánar út í það. Önnur félög höfðu samband en hjartað sagði mér að koma hingað."

Óli Jó spilaði stóran þátt
Ólafur Jóhannesson, fyrrum þjálfari Vals, kom að þessum félagaskiptum en hann sinnir ráðgjafahlutverki á Hlíðarenda. Óli Jó og Sigurður Aðalsteinsson, faðir Gylfa, eru góðir vinir.

„Hann var í sambandi við föður minn reglulega síðustu tólf mánuði eða svo. Hann var alltaf að spyrja hvernig ég hefði það og hver staðan á mér væri, hvort ég vildi ekki koma að æfa með Valsliðinu og svo framvegis. Hann var stór partur af þessu."

Stór fjölskylda
Gylfi hefur myndað tengingu við Val á síðustu mánuðum en hann sást á körfuboltaleikjum hjá félaginu í fyrra, ásamt því að hann mætti á æfingar í fótboltanum. „Það var geggjað að vera á körfunni hérna í úrslitakeppninni. Það var í fyrsta sinn sem ég hef verið heima á þessum tíma og haft möguleikann á því að koma á leiki."

„Maður finnur það þegar maður er hérna að það er gríðarlegur áhugi á öllum íþróttum. Valur er með frábær lið í karla- og kvennabolta í mismunandi íþróttum. Þetta er stórt félag og maður finnur að þetta er stór fjölskylda."

Með innkomu Gylfa í Val er ekki útilokað að það verði körfuboltastemning á fótboltaleikjunum á Hlíðarenda í sumar. Það væri allavega ekki leiðinlegra fyrir Gylfa og félaga.

Líður vel eftir æfinguna í gær
Gylfi hefur verið að glíma við meiðsli frá því seint á síðasta ári og ekkert spilað síðan í nóvember. Góður möguleiki er á að hann muni spila sinn fyrsta leik fyrir Val í kvöld.

„Mér leið mjög vel á Spáni. Hitinn er vinur sinavandamála. Ég var að æfa á mjög góðu grasi úti og það var frábært. Ég náði að æfa mjög vel og mér fannst ég vera í fínu standi. Það er smá munur að koma hér heima í kuldann en mér líður samt vel eftir æfinguna í gær. Eins og er, þá er ekkert vesen," segir Gylfi.

„Fyrsti leikur er í kvöld og ég er tilbúinn í hann. Ég mun auðvitað ekki spila mjög margar mínútur ef ég spila en þetta er góður undirbúningur fyrir mótið. Það er mikilvægt fyrir okkur að vinna leikinn og komast í úrslit. Við erum mjög spenntir."

Kominn tími á að vera heima í eðlilegu lífi
Gylfi segist ekki endilega hafa búist við því fyrir nokkrum árum að hann væri að koma heim á þessum tímapunkti, en hann er ánægður með það. Hann sneri aftur í fótbolta í fyrra eftir tveggja ára fjarveru og hugsar ekki um að hætta núna.

„Mig langaði alltaf þegar ég var yngri að spila á Íslandi seint á ferlinum. Ég bjóst samt kannski við að ég myndi hætta í fótbolta þegar ég var 32 eða 33 ára en svo langar mig núna að spila áfram. Ég veit ekki alveg hvort ég bjóst við þessu en það er gaman að vera kominn heim. Ég er búinn að vera úti í einhver 19 ár eða eitthvað. Það er kominn tími á að vera heima í eðlilegu lífi nær vinum og fjölskyldu," segir Gylfi sem verður 35 ára á árinu. Hann hefur átt magnaðan feril þar sem hann hefur lengst af spilað í ensku úrvalsdeildinni.

Verða vonandi betri en ég í sumar
Að Gylfi sé kominn heim í Bestu deildina eru einhver stærstu tíðindi í sögu efstu deildar á Íslandi enda er Gylfi einn besti fótboltamaður sem hefur komið frá Íslandi, ef ekki sá besti. Hann býst samt ekki endilega við því að koma hér heim í deildina og vera langbestur

„Nei, alls ekki. Í Valsliðinu er fullt af ungum og spennandi strákum sem verða vonandi betri en ég í sumar því þeir eiga framtíðina fyrir sér. Ég mun gera allt sem ég get til að vera í mínu besta standi, hvernig sem það verður."

Gylfi talaði um það þegar hann skrifaði undir hjá Val að hann ætlaði sér að verða Íslandsmeistari, það væri markmiðið. Hann segist vera að einbeita sér að því núna að koma sér í fullkomið stand fyrir tímabilið en það er stutt í mót. Hann segir gaman að sjá hversu mikill áhugi er á komu hans í deildina.

„Mér hefur verið sagt hitt og þetta, en það er bara jákvætt að áhuginn er að aukast. Ég held að hann hafi verið að gera það síðustu ár. Það eru mörg lið sem eru búin að vera að fá leikmenn erlendis frá sem hafa verið að spila á Norðurlöndum og meginlandinu. Ég held að liðin séu að verða sterkari og sterkari," sagði Gylfi að lokum en viðtalið er hægt að horfa á í heild sinni í spilaranum hér fyrir ofan.