„Þetta var mjög flottur leikur af okkar hálfu," sagði Sigurður Jónsson þjálfari Kára eftir 4-2 sigur á Völsungi í 3. deildinni í dag.
Kári er með sjö stig eftir þrjár fyrstu umferðirnar í 3. deildinni en Sigurður býst við hörkukeppni í sumar.
„Þetta verður nokkuð jafnt. Þetta er strembin deild. Markmiðið hjá okkur er að vera í efri hlutanum og vera í topp fjórum. Við erum komnir með sjö stig sem nýliðar í deildinni en við vitum að þetta verður strembið. Þetta er rétt að byrja."
Athygli vakti undir lok félagaskiptagluggans þegar Kári fékk miðjumanninn Farid Zato í sínar raðir frá KR. Farid er að jafna sig eftir erfið meiðsli en hann er allur að koma til.
„Hann er að koma til eftir meiðsli. Við erum að vinna vel saman og það er gaman að fá hann hingað. Hann er að æfa þrisvar á dag og við tökum einn dag í einu og sjáum hvað setur. Hann lítur ágætlega út."
Sigurður er á sínu öðru tímabili sem þjálfari Kára en hann tók við liðinu í fyrra. Þá komst Kári upp úr 4. deildinni.
„Þegar ég tók við þá var þetta svolítið bras. Strákarnir hafa verið duglegir að æfa í vetur og við erum hægt og bítandi að batna og fá meiri metnað í klúbbinn."
Hér að ofan má sjá viðtalið í heild sinni.
Athugasemdir