Guðrún Karítas Sigurðardóttir skrifaði undir þriggja ára sdamning en Ásdís samdi til tveggja ára.

„Hér eru á ferðinni tvær öflugar knattspyrnukonur sem spiluðu stórt hlutverk með sínu félagsliði á seinasta tímabili. Hjá Val bíður þeirra ný áskorun í metnaðarfullu umhverfi sem á eftir að styrkja þær og efla enn frekar," segir í fréttatilkynningu frá Val.

Guðrún Karítas sem er 21 árs gömul er uppalin hjá ÍA en hún hefur einnig leikið með Stjörnunni og KR. Guðrún á að baki 99 meistaraflokks leiki í deild og bikar og hefur skorað í þeim leikjum 32 mörk. Hún á jafnframt 16 landsleiki með yngri landsliðum Íslands.

Ásdís Karen verður 18 ára í desember og á hún að baki 48 leiki í meistaraflokki og 25 leiki með yngri landsliðum. Í þessum leikjum hefur Ásdís skorað 13 mörk.

Pétur Pétursson tók við þjálfun Vals í haust en í síðustu viku samdi landsliðskonan Hallbera Guðný Gísladóttir við félagið.