Búist er við að tveir til þrír leikmenn úr hverju félagi vilji ekki spila vegna nákominna aðstandenda sem væru í mikilli lífshættu ef þeir fengu veiruna.

Einhverjir leikmenn vilja tryggingu frá félagi sínu ef þeir eða fjölskyldumeðlimir fá veiruna vegna þátttöku þeirra í fótbolta.

Einn ónefndur leikmaður Brighton hefur miklar efasemdir um að geta spilað þar sem kærasta hans er með alvarlegan undirliggjandi sjúkdóm sem gæti gert kórónuveiruna banvæna.

Þá hafa menn á borð við Sergio Agüero og Antonio Rüdiger opinberlega lýst yfir áhyggjum sínum ef úrvalsdeildartímabilið á að fara af stað aftur meðan veiran er enn í gangi.

Mark Noble, fyrirliði West Ham, staðfesti að stór hluti leikmannahópsins hefði áhyggjur vegna veirunnar og vildi helst ekki taka áhættuna á að spila fótbolta.

Stefnt er á að klára úrvalsdeildina í sumar á hlutlausum völlum en einhver félög eru mótfallin þeirri hugmynd. Hugmyndin verður rædd ítarlega á fundi næsta fimmtudag og líklegt að félög verði látin kjósa um málið á næstu vikum.

70% úrvalsdeildarfélaga þurfa að vera sammála um niðurstöðu til að hún geti verið staðfest. Það eru 14 af 20 félögum.