Davíð Smári Lamude þjálfari Vestra var svekktur með úrslit dagsins eftir að liðið hans tapaði 3-2 gegn FH í Kaplakrika.
Lestu um leikinn: FH 3 - 2 Vestri
„Ég er gríðarlega ósáttur, við gáfum þetta frá okkur í seinni hálfleik. Gríðarlega svekkjandi."
Vestri var yfir í hálfleik 2-1 en fengu á sig mark strax eftir 2 mínútur í seinni hálfleik.
„Menn labba ekki nægilega gíraðir inn í seinni hálfleikinn. Ég svo sem átta mig ekki alveg á því, við fórum vel yfir hlutina í hálfleik og við vissum alveg að fyrstu 10-15 mínútur í seinni hálfleik yrðu erfiðar og að þeir myndu þrýsta vel upp. Við vissum alveg af því, og við vorum með ákveðnar lausnir sem við ætluðum að nota við því. Það bara gerðist ekki og þetta bara rann okkur úr greipum og engum um að kenna nema okkur sjálfum."
Vestri þurfti að gera tvær breytingar í fyrri hálfleik vegna meiðsla. Það eru nú þegar nokkrir á meiðslalistanum hjá þeim og gæti því verið ákveðinn hausverkur fyrir Davíð að fylla í þau skörð.
„Það er bara partur af þessu að menn meiðast, en bara svekkjandi. Þetta er nákvæmlega eins brot eins og við lendum í, í síðasta leik þar sem að sólinn fer óþægilega hátt frá jörðu og sparkað undir sólann. Í þetta skiptið var það ekki spjald einu sinni. Eins og ég segi, þetta er leiðinlegt en þetta er bara partur af þessu. Þetta er ekki gott en Friðrik kemur hérna inn í dag og er frábær, það er stutt í Morten. Við vissum það þegar við komum inn í mót að við þyrftum að vera með stóran hóp og við teljum okkur vera með það. Það kemur bara maður í manns stað í þessu."
Viðtalið má sjá í heild sinni í spilaranum hér fyrir ofan.
