Lestu um leikinn: Valur 3 -  2 Fylkir

Fylkir fékk martraðarbyrjun en Vesna Elísa Smiljkovic skoraði beint úr hornspyrnu strax í upphafi leiks. Hermann var ósáttur við markið þar sem honum fannst stigið fyrir Ástu Vigdísi markmann. Þegar sambærilegt atvik kom upp hinum megin var hinsvegar dæmt brot á sóknarmann.

„Þetta er beint úr horni, hræðilegt mark. Það var dæmt af okkur mark af því að einhver stóð nálægt markmanni en svo er hún (Ásta Vigdís) blokkeruð og alveg staðið fyrir henni en það stendur. Þetta er hrikalega dýrt. Það er bara þannig. Auðveldara að dæma á móti litlu liðunum? En ég ætla samt ekkert að vera að tala um það,“ sagði Hemmi sem vildi frekar ræða frammistöðu síns liðs en dómarans.

Fylkir sýndi karakter og jafnaði leikinn í annað sinn á lokamínútum leiksins þegar Kaitlyn Johnson skoraði draumamark. Hélt Hemmi þá að hann fengi stig úr leiknum?

„Maður heldur ekkert og ég vildi þá fá þriðja markið. Við þurfum að vinna leiki.“

Þrátt fyrir að stigasöfnunin hafi staðið á sér er allt annað að sjá til Fylkisliðsins og Hemmi hrósaði leikmönnum sínum í hástert fyrir trú og eljusemi.

„Við erum búin að skora 5 mörk í 4 leikjum og erum búin að vera inní öllum þessum leikjum. Kredit til stelpnanna að hafa þessa trú ennþá. Þær unnu síðast leik í apríl en mæta í hvern einasta leik og á hverja einustu æfingu fullar af sjálfstrausti og trú.“

Hægt er að horfa á allt viðtalið við Hemma í sjónvarpinu hér að ofan.