Í vikunni var tilkynnt að hinn 24 ára gamli Zaha hefði tekið ákvörðun um að leika fyrir Fílabeinsströndina, landið sem hann fæddist í þrátt fyrir að hann hafi þegar leikið tvo A-landsleiki fyrir England.

Þar sem það voru vináttuleikir getur Zaha enn valið að skipta um þjóðerni og leika fyrir Fílabeinsströndina en Southgate var viðstaddur leik Crystal Palace og Southampton í gær. Hann var í kjölfarið spurður út í þetta mál.

„Við erum að vona að við náum að tala Wilf (Zaha) til. Hann er leikmaður sem ég hef unnið með hjá U-21 árs landsliðinu og hann hefur spilað frábærlega á þessu tímabili."

„Ég hef rætt þetta við Alan Pardew og líka við stjórnarformann Palace, Steve Parish."

„Zaha hefur ómælda hæfileika og er að spila vel fyrir sitt lið. Ég myndi vilja fá að tala við hann áður en hann tekur þessa ákvörðun. Ég get ekki sagt til um hvort hann sé kominn of langt í þessu ferli til að snúa til baka fyrr en ég er búinn að ræða við hann," segir Southgate.