Vikan í enska boltanum var viðburðarík en Garth Crooks hjá BBC hefur valið lið vikunnar. Arsenal komst aftur á toppinn, yfirburðir Liverpool voru ekki nóg gegn Manchester United og þá tapaði Chelsea óvænt stigum gegn botnliði Sheffield United.
Markvörður: Jordan Pickford (Everton) - Englendingurinn þekkir það vel að vera í erfiðum kringumstæðum á þessum hluta tímabilsins. Var frábær gegn Newcastle í miðri viku og hélt hreinu í 1-0 sigri á Burnley um helgina.
Varnarmaður: Micky van de Ven (Tottenham) - Skoraði geggjað mark í 3-1 sigrinum á Nottingham Forest og hjálpaði sínu liði í baráttunni um Meistaradeildarsæti. Frábær frammistaða, bæði í vörn og sókn.
Varnarmaður: Gabriel (Arsenal) - Sá hefur verið góður undanfarið. Varnarleikurinn mun skipta miklu máli á lokametrunum og ákveða það hvort liðið verði meistari eða ekki. Átti geggjaða björgun í 3-0 sigrinum gegn Brighton og virðist ekkert komast fram hjá honum þessa dagana.
Varnarmaður: William Saliba (Arsenal) - Saliba og Gabriel er tvenna. Traustur í vörninni og sá fyrsti sem fagnaði með Gabriel eftir að Brasilíumaðurinn kastaði sér fyrir skot undir lokin. Þvílíkt teymi!
Miðjumaður: Bruno Guimaraes (Newcastle) - Einn sá mikilvægasti í Newcastle-liðinu. Gerði sigurmarkið gegn Fulham um helgina og alveg ljóst að félagið verður að halda í hann ef það ætlar að ná árangri á næsta tímabili.
Miðjumaður: Kobbie Mainoo (Man Utd) - Geggjaður á miðsvæðinu gegn Liverpool. Skoraði stórkostlegt mark og gleymist oft að hann er bara 18 ára gamall. Verður bara betri með hverjum leiknum.
Miðjumaður: Declan Rice (Arsenal) - Maður er betur og betur að skilja af hverju hann kostaði 105 milljónir punda. Frábær gegn Brighton og virkilega að njóta sín í liði Arsenal.
Miðjumaður: Kevin de Bruyne (Man City) - Skoraði tvö og lagði upp eitt gegn Palace. Endalaus gæði og ekki hægt að finna réttu lýsingarorðin um einn besta leikmann í sögu deildarinnar.
Sóknarmaður: Carlton Morris (Luton) - Skoraði mikilvægt sigurmark í 2-1 sigrinum á Bournemouth. Góð afgreiðsla og gæti reynst mikilvægt mark þegar talið verður upp úr pokanum í maí.
Sóknarmaður: Ollie Watkins (Aston Villa) - Heitasti framherji ensku úrvalsdeildarinnar. Skoraði tvö mörk í 3-3 jafnteflinu gegn Brentford og er nú kominn með 18 mörk og 10 stoðsendingar á tímabilinu!
Sóknarmaður: Dominic Calvert-Lewin (Everton) - Tryggði Everton sigurinn á Burnley. Fimmta mark hans á tímabilinu og bjargaði þá stigi gegn Newcastle í miðri viku. Englendingurinn að stíga upp á mikilvægasta kafla tímabilsins.
Athugasemdir
