Hunter er til hægri, Jimmy Greaves til vinstri. Greaves var lagður inn á spítala fyrir helgi en er ekki með kórónuveiruna.
Hinn 76 ára gamli Norman Hunter, goðsögn hjá Leeds, hefur verið lagður inn á spítala með kórónuveiruna. Tilfellið er talið nokkuð alvarlegt og gæti Hunter verið í lífshættu ef ástandið versnar.
Orðrómur hefur verið í gangi síðustu tvær vikur um að Hunter væri með veiruna en það fékkst ekki staðfest fyrr en í dag, þegar hann var lagður inn á spítala.
Hunter var partur af landsliði Englands sem vann HM 1966 en spilaði þó engan leik á mótinu þar sem Jack Charlton og Bobby Moore sáu alfarið um miðvarðarstöðurnar.
Hunter spilaði 28 landsleiki fyrir England og 540 leiki á tíma sínum hjá Leeds, þar sem hann vann efstu deild tvisvar auk FA bikarsins og deildabikarsins.
Eftir leikmannaferilinn gerðist Hunter knattspyrnustjóri. Hann stýrði Barnsley í fjögur ár og Rotherham í tvö ár áður en hann ákvað að kalla það gott 1987.
Athugasemdir