Simone Inzaghi, þjálfari Inter á Ítalíu, hefur staðfest komu íranska landsliðsmannsins Mehdi Taremi en hann kemur til félagsins á frjálsri sölu frá Porto í sumar.
Ítalski íþróttafréttamaðurinn Fabrizio Romano greindi frá þvi í febrúar að Inter væri búið að ganga frá samkomulagi við Taremi.
Þessi 31 árs gamli leikmaður var bókaður í læknisskoðun og skrifaði undir tveggja ára samning við ítalska félagið.
Inzaghi hefur nú staðfest skiptin.
„Já, við höfum gengið frá samningum við Mehdi Taremi, sem kemur á frjálsri sölu frá Porto. Hann er mikilvægur leikmaður í landsliðsklassa. Hann hefur skorað mörg mörk og við erum ánægðir með þessi skipti,“ sagði Inzaghi við DAZN.
Taremi hefur komið að fimmtán mörkum með Porto í 32 leikjum á þessari leiktíð.
Athugasemdir