Cádiz og Granada áttust við í fyrsta leik helgarinnar í efstu deild spænska boltans og var staðan markalaus í leikhlé.

Heimamenn í Cadiz voru sterkari aðilinn og tóku forystuna í upphafi síðari hálfleiks þegar Robert Navarro kom boltanum í netið.

Gestirnir frá Granada gerðu sig ekki líklega til að jafna og urðu lokatölur 1-0 fyrir Cadiz.

Þetta er gríðarlega mikilvægur sigur í fallbaráttunni, þar sem Cadiz er núna með 25 stig eftir 30 umferðir. Liðið er aðeins búið að sigra fjóra deildarleiki á tímabilinu en getur þó enn bjargað sér frá falli.

Cadiz er tveimur stigum frá öruggu sæti í deildinni þegar liðið á eftir að spila átta leiki af tímabilinu.

Granada er svo gott sem fallið og situr í næstneðsta sæti með 14 stig.