Aron Elís Þrándarson leikmaður Víkings spilaði sinn fyrsta byrjunarliðs leik á tímabilinu í dag þar sem hann skoraði eitt mark í 4-2 sigri gegn KA.
Lestu um leikinn: Víkingur R. 4 - 2 KA
„Við vissum að þetta yrði erfður leikur, KA menn þurfa á stigum að halda, en við vorum bara betri fannst mér og við sigldum þessu í lokin."
Víkingar fengu umdeilda vítaspyrnu í fyrri hálfleik en Aron hefði viljað sjá annan lit á spjaldinu sem fór á loft.
„Fyrir mér þá bara rænir hann upplögðu marktækifæri af Ara og það er bara rautt spjald líka, en hann dæmir það ekki. Þeir hefðu kannski getað fengið eitt víti þarna, ég veit það ekki, ég þarf bara að sjá það í sjónvarpinu. En það er erfitt að dæma svona þegar það er alltaf öskrað, þannig ég skil alveg dómarann að það var smá bras."
Víkingar eru með fullt hús stiga eftir 4 leiki í deild og þeir fóru áfram í bikarnum. Algjör óskabyrjun.
„Bara eins og við stefndum á, en það þýðir ekkert að slaka neitt því að hin liðin eru á eftir okkur og við vitum það alveg. Þannig við bara höldum áfram." Valur og Breiðablik sem flestir telja líklegustu liðin til að berjast um titilinn við Víking hafa þó farið hikstandi af stað. „Við reynum bara að fókusera á sjálfa okkur en auðvitað erum við meðvitaðir um hvað hin liðin að gera. Ég væri bara að ljúga því ef ég segði að við værum ekki að gera það. En við bara spilum okkar leik og það hefur bara gengið helvíti vel hingað til."
Viðtalið má sjá í heild sinni í spilaranum hér fyrir ofan.
