Arsenal verðskuldaði sigurinn en það tók liðið 33 mínútur að komast yfir er Bukayo Saka skoraði úr vítaspyrnu eftir að Gabriel Jesus var tekinn niður í teignum.

„Við spiluðum góðan fyrri hálfleik og ágætlega í þeim síðari eða fram að öðru marki Arsenal. Eftir það spiluðum við ekki svo vel og verðskulduðum það að tapa gegn einu besta liði ensku úrvalsdeildarinnar. Með okkar meiðsli getum við ekki keppt við Arsenal.“

Einhver umræða var um vítaspyrnuna. Bæði hvort að Jesus hafi verið kominn inn í teig og hvort Tariq Lamptey hafi náð til boltans áður en hann tók Jesus niður. Vítaspyrna var dæmd en De Zerbi var spurður út í dóminn.

„Þetta var augljóst víti og bara áfram gakk.“

Brighton hefur ekki náð sömu hæðum og á síðasta tímabili en meiðsli og annað hefur sett strik í þennan margumtalaða reikning.

„Við erum miður okkar og vonsviknir fyrir hönd stuðningsmanna. Við vildum ná í stigin, vinna leikinn og sýnt meiri baráttu. Við erum á erfiðu augnabliki því við erum án margra leikmanna, sem eru frá vegna meiðslai og það er bara rosalega erfitt.“

„Á síðasta tímabili gekk betur því við spiluðum aðeins einn leik í viku. Á næsta tímabili held ég að við getum náð sömu hæðum og við erum með marga unga leikmenn sem við teljum efnilega.“

„Við verðum að vera jákvæðir, leggja vinnuna á okkur og einbeita okkur á vellinum. Ég er að þjást núna því það er erfitt að tapa,“ sagði De Zerbi.