Gíneumaðurinn Serhou Guirassy var hetja Stuttgart sem lagði Borussia Dortmund að velli, 1-0, á Signal Iduna Park í dag.

Dortmund var betra liðið í fyrri hálfleiknum. Emre Can átti skot fyrir utan teig sem Alexander Nübel varði ágætlega en hann gerði enn betur fimmtán mínútum síðar er Karim Adeyemi fór illa með Josha Vagnoman.

Adeyemi komst einn í gegn en Nübel varði frábærlega með löppunum og þaðan fór boltinn aftur fyrir endamörk.

Guirassy skoraði eina markið á 64. mínútu. Jamie Leweling kom með góða sendingu inn í miðjan teiginn og tók Guirassy viðstöðulaust skot efst upp í hægra hornið. Þetta var hans 24. mark í deildinni á þessari leiktíð, en aðeins Harry Kane hefur skorað fleiri.

Dortmund fór í leit að jöfnunarmarki en Nübel sá til þess að það kæmi ekki. Hann varði ótrúlegan skalla frá Sebastien Haller áður en boltinn datt fyrir lappir Nico Schlotterbeck. Hann stóð hálfum metra frá markinu og Nübel bugaður í grasinu, en skot hans himinhátt yfir markið.

Stuttgart-liðið heppið þarna. Það er áfram í 3. sæti með 60 stig, jafnmörg og Bayern München sem er með betri markatölu. Dortmund er í 5. sæti með 53 stig eins og Leipzig sem er í 4. sætinu.