Emil Hallfreðsson byrjaði á bekknum þegar Udinese fékk Torino í heimsókn í Seríu A í dag.

Leikurinn byrjaði ekki vel fyrir Udinese því strax á 12. mínútu skoraði Pontus Jansson og kom gestunum yfir.

Afriyie Acquah bætti við marki undir lok fyrri hálfleiks og staðan var 2-0 í hálfleik. Felipe minnkaði muninn fyrir Udinese í upphafi síðari hálfleiks, en Torino svaraði með tveimur mörkum.

Staðan var því 4-1, en nokkrum mínútum eftir fjórða mark Torino kom Emil Hallfreðsson inn á. Emil spilaði síðasta hálftímann, en Josef Martinez skoraði fimmta og síðasta mark Torino og þar við sat.

5-1 sigur Torino staðreynd, en liðið er með 45 stig í tíunda sæti á meðan Emil og félagar í Udinese eru með 38 stig í 16. sæti.