Túfa var ekki ánægður með leik sinna manna í dag
KA heimsótti FH í 4.umferð Pepsí-deildar karla og þurfti að lúta í lægra haldi fyrir sterku FH liði, 3-1 tap staðreynd. Túfa þjálfari KA manna sagði að fyrri hálfleikurinn hefði spilast vel en svo fór leikurinn niður á við í seinni hálfleik.
Lestu um leikinn: FH 3 - 1 KA
„Við spiluðum fyrri hálfleik mjög vel, eins og við lögðum upp með og með örlítið meiri gæði hefðum við verið yfir í hálfleik. Í seinni hálfleik fáum við á okkur tvö klaufaleg mörk og erum að elta leikinn."
Mikill óstöðugleiki hefur verið í leik KA manna á tímabilinu og Túfa sagði að það væri áhyggjuefni en benti þó á að liðið átti góðar 90 mínútur gegn ÍBV.
„Síðustu helgi vorum við að binda saman 90 mínútur mjög vel eins og við gerðum í allan vetur. Núna erum við ekki að ná því og það er eitthvað sem við þurfum að laga."
Milan Joksimovic og Steinþór Freyr Þorsteinsson hafa ekkert spilað með KA í vetur en þeir ættu að vera klárir í næstu viku.
„Þeir eru meiddir, ég er orðinn frekar þreyttur á þessum spurningum, spyrjið mig frekar um Danna Hafsteins eða Frosta Brynjólfs sem eru að spila sína fyrstu leiki í meistaraflokki. Ég reikna samt með að þeir verði klárir í næstu viku."
Athugasemdir
