3. Vestri
Lokastaða í fyrra: 9. sæti í 2. deild
Vestri olli miklum vonbrigðum í deildinni í fyrra. Liðinu var spáð öðru sæti hér á Fótbolta.net en lenti í níunda sæti. Ljóst er að liðið ætlar sér að gera betri hluti núna í ár.

Þjálfarinn: Reynsluboltinn Bjarni Jóhannsson er tekinn við Vestra. Bjarni hefur á löngum ferli þjálfað Grindavík, Fylki, ÍBV, Breiðablik, Stjörnuna og KA. Hann hefur mest af þjálfað í Pepsi-deildinni þannig að þetta verður ný reynsla fyrir hann.

Styrkleikar: Þjálfarinn er einn sá reynslumesti í bransanum hér á landi. Hann er að fara að sjá til þess að þetta Vestra-lið er ekki að fara að vera í einhverri fallbaráttu. Liðið hefur sótt góða leikmenn með reynslu hér á landi. Markaskorun ætti ekki að vera mikið vandamál fyrir Vestra. Liðið skoraði 18 mörk í Mjólkurbikarnum um daginn og það virðast vera margir sem geta skorað mörkin í þessu liði.

Veikleikar: Liðið tapaði gegn liðum eins og KFG og Augnblik í Lengjubikarnum og þarf að sýna betri frammistöðu en þar í sumar. Liðið olli mestum vonbrigðum af öllum liðum deildarinnar í fyrra. Eru menn búnir að jafna sig á því? Liðið sýndi góðar rispur inn á milli í fyrra. Í sumar þarf liðið að sýna miklu fleiri góðar rispur til þess að eiga möguleika á því að gera eitthvað. Vestri missti tvo af sínum bestu leikmönnum í vetur, Aurelien Norest og Mehdi Hadraoui. Vonandi fyrir Vestramenn hefur skarð þeirra verið nægilega vel fyllt.

Lykilmenn: Daði Freyr Arnarsson, Elmar Atli Garðarsson og James Mack.

Bjarni Jóhannsson, þjálfari Vestra:
„Þetta er fín spá. Við höfum verið að þétta raðirnar nú á síðustu vikum og eru komnir með góðan hóp sem er klár í slaginn. Auðvitað er þetta bara spá og við vitum að allt getur gerst. Getumunur liða í þessari deild er lítill og því spennandi mót framundan. Leikmannabreytingar liða í 2.deild milli ára eru ótrúlegar og því erfitt að spá. Frá því að við spáðum þar til nú hafa átt sér stað 10-15 félagaskipti og eiga sjálfsagt eftir að verða annað eins þar til glugginn lokar um miðjan maí. Deildin verður hörð og erfið. Liðin eru að leggja mikið í þetta og löng og ströng ferðalög eru framundan þar sem liðin eru frá öllum landshornum. Okkar markmið eru að berjast í toppnum og gera harða atlögu að Inkasso-deildinni. Liðið endaði í 9.sæti í fyrra og þar viljum við ekki vera."

Er von á frekari liðsstyrk á næstu misserum?

„Ef leikmenn sem styrkja liðið bjóðast og vilja koma í „Vilta Vestrið" þá er allt opið."

Komnir:
Andy Pew frá Selfossi
Akil DeFreitas frá Sindra
James Mack frá Selfossi
Sergine Modou Fall frá ÍR
Zoran Placonic frá Króatíu

Farnir:
Aurelin Norest til Svíþjóðar
Deyan Minev til Kýpur
Francis Adjei Ghana
Gilles Ondo í Selfoss
Kevin Alson Schmidt til Hollands
Mehdi Hadraoui til Belgíu
Saul Halpin til Ástralíu

Fyrstu leikir Vestra:
5. maí Leiknir F - Vestri (Fjarðabyggðarhöllin)
12. maí Vestri - Höttur (Olísvöllurinn)
19. maí Völsungur - Vestri (Húsavíkurvöllur)