Salomon Rondon gerði bæði mörk Newcastle í fyrri hálfleik og minnkaði Jefferson Lerma muninn fyrir gestina rétt fyrir leikhlé.

Leikurinn var nokkuð jafn og gerðu heimamenn mjög vel að takmarka færi Bournemouth í síðari hálfleik.

Felipe Anderson bjargaði þá stigi fyrir West Ham á móti Huddersfield og gerði Jose Holebas slíkt hið sama fyrir Watford gegn Southampton.

Jóhann Berg Guðmundsson lék fyrstu 65 mínúturnar í markalausu jafntefli Burnley og Leicester í fyrsta leiknum á King Power leikvanginum eftir andlát Vichai Srivaddhanaprabha.

Fallbaráttuliðin sem mættu til leiks í dag eru því öll búin að ná sér í stig. Newcastle, Burnley og Southampton eru rétt fyrir ofan fallsvæðið en Huddersfield er áfram í næstneðsta sæti, aðeins einu stigi frá öruggu sæti.

Bournemouth hefði getað jafnað Arsenal á stigum með sigri í dag og Watford er búið að jafna Manchester United á stigum í sjöunda sæti.

Crystal Palace getur orðið fyrsta fallbaráttuliðið til að halda heim án stiga er liðið fær toppbaráttulið Tottenham í heimsókn í síðasta leik dagsins, sem verður sýndur beint á Stöð 2 Sport.

Huddersfield 1 - 1 West Ham
1-0 Alex Pritchard ('6 )
1-1 Felipe Anderson ('74 )

Leicester City 0 - 0 Burnley

Newcastle 2 - 1 Bournemouth
1-0 Salomon Rondon ('7 )
2-0 Salomon Rondon ('39 )
2-1 Jefferson Lerma ('45 )

Southampton 1 - 1 Watford
1-0 Manolo Gabbiadini ('20 )
1-1 Jose Holebas ('82 )