Rotherham United er fallið niður í C-deildina á Englandi en þetta varð ljóst eftir 1-0 tap liðsins gegn Plymouth í kvöld.

Bali Bumba skoraði eina mark leiksins á 32. mínútu með góðu skoti en sóknarleikur Rotherham var ekki upp á marga fiska, líkt og í síðustu leikjum.

Plymouth kom sér í fín færi undir lokin til að ganga frá leiknum en sætti sig á endanum við að taka öll stigin.

Tap Rotherham þýðir að liðið er fallið niður í C-deildina en liðið er í neðsta sæti með aðeins 23 stig. Plymouth er áfram í baráttu um að halda sér uppi en liðið situr í 19. sæti með 44 stig, fjórum stigum frá fallsæti þegar sex leikir eru eftir.

Fyrrum landsliðsmaðurinn Kári Árnason er eflaust að upplifa blendnar tilfinningar á þessu annars ágæta föstudagskvöldi, en hann lék með bæði Plymouth og Rotherham á atvinnumannaferli sínum.

Kári spilaði með Plymouth frá 2009 til 2011 áður en hann fór til Aberdeen í Skotlandi. Hann hélt síðan aftur í enska boltann árið seinna og samdi þá við Rotherham. Þar lék hann í þrjú ár undir hinum stórskemmtilega þjálfara Steve Evans, en þeir félagarnir fóru saman upp í B-deildina árið 2014.