Empoli er nú þremur stigum fyrir ofan fallsæti eftir að hafa unnið heldur dramatískan 3-2 sigur á Torino í Seríu A í kvöld.

Nicolo Cambiaghi kom heimamönnum á bragðið á 6. mínútu með þrumuskoti fyrir utan teig og reyndist það eina mark fyrri hálfleiksins.

Gestirnir ógnuðu strax í byrjun síðari og gat það ekki endað öðruvísi en með marki. Duvan Zapata stangaði boltanum í netið eftir hornspyrnu á 60. mínútu.

Fjórtán mínútum síðar kom Matteo Cancellieri liði Empoli aftur yfir með föstu skoti vinstra megin úr teignum og í hægra hornið.

Zapata jafnaði aftur metin á fyrstu mínútu í uppbótartíma og aftur var það með skalla. Torino taldi sig hafa bjargað stigi þarna en svo var ekki.

Raoul Bellanova, leikmaður Torino, gerði hræðilega er hann reyndi að skýla boltanum í teig sínum. Liberato Cacace náði að pota boltanum frá Bellanova áður en hann sendig á M'Baye Niang sem skoraði fyrir opnu marki.

Svekkjandi fyrir Torino en rosalega dýrmætt fyrir Empoli sem er nú í 15. sæti með 28 stig, þremur stigum fyrir ofan fallsæti. Torino er í 9. sæti með 44 stig.

Empoli spilaði hörmulega í byrjun tímabilsins og var fast við botninn en hagur liðsins vænkaðist aðeins. Empoli hafði tapað fjórum deildarleikjum í röð áður en það landaði þessum mikilvæga sigri í kvöld.