Gary O'Neil, stjóri Wolves, hefur mikið talað um VAR í vetur, Úlfarnir hafa fengið ófá atvik á móti sér.

Tony Harrington dómari leiksins fór í VAR-skjáinn eftir ósk VAR-dómara og ákvað í kjölfarið að dæma markið af. Lokatölur urðu 1-2 fyrir West Ham.

Nokkrir starfsmenn og leikmenn Úlfanna fengu gul spjöld fyrir mótlæti eftir að leiknum lauk. O'Neil hins vegar strunsaði inn göngin þar sem hann hefði fengið sitt þriðja gula spjald ef hann hefði mótmælt og komið sér þannig í leikbann.

Í viðtali við Sky Sports lét hann hins vegar gamminn geisa.

„Það er skoðun mín, skoðun David Moyes og skoðun Fabianski að það sé skandall að dæma þetta mark af, hneyksli. Hræðilegt. Ég skil þetta ekki," sagði stjórinn.

„Ég get ekki ímyndað mér hver ástæðan fyrir þessu er. Þetta er ein versta ákvörðun sem ég hef orðið vitni að. Hræðileg ákvörðun því eina sem hann gæti haft áhrif er hvort Fabianski geti hreyft sig eða ekki, og það er ekki staðan. Fabianski getur klárlega séð boltann með því að horfa yfir Tawanda."

„Nei ég var ekki nógu rólegur til að fara til dómarans og biðja um ástæðu. Hann er í raun ekki með neina ástæðu og útskýring hjálpar okkur ekki. Það eru allir á því að þetta sé hræðileg ákvörðun."

„Vel skólaður úrvalsdeildardómari horfir á skjá með hægar endursýningar en nær samt að taka ranga ákvörðun. Ég er samt viss um að hann hafi ekki gert það viljandi."

„Þetta er orðið svo pirrandi með dómgæsluna," sagði O'Neil. Sky Sports fjallar um fjögur stór atvik fyrr á þessu tímabili sem hafa farið á móti Wolves og má lesa um það hér.