Stórleikur umferðarinnar fór fram á Old Trafford í dag þegar heimamenn tóku á móti Liverpool.

Liverpool var með algjöra yfirburði fram á 50. mínútu. Luis Díaz kom Liverpool yfir á 23. mínútu með marki eftir hornspyrnu og Liverpool hefði getað bætt við fleiri mörkum áður en hálfleikurinn kláraðist, yfirburðirnir voru miklir. Það gerðist hins vegar ekki og staðan því 0-1 í hálfleik.

Á fimmtu mínútu seinni hálfleiks gáðu Jarrel Quansah, leikmaður Liverpool, ekki að sér þegar hann ætlaði sér að gefa boltann Virgil van Dijk á miðjum vellinum. Bruno Fernandes las sendinguna, komst í boltann og lét vaða úr miðjuhringnum og jafnaði með fyrsta skoti United í leiknum, glæsilegt skot og ekkert sem Caoimhin Kelleher í marki Liverpool gat gert.

Ungi miðjumaðurinn Kobbie Mainoo kom svo United yfir á 67. mínútu þegar hann smurði boltann í fjærhornið með skoti utarlega úr teignum. Tvö glæsileg mörk og United komið yfir.

Liverpool gafst hins vegar ekki upp og vann Harvey Elliott vítaspyrnu þegar Aaron Wan-Bissaka gerði barnaleg mistök og fór í Elliott inni í vítateig United. Mo Salah steig á punktinn og gerði allt rétt, setti boltann til vinstri á meðan Andre Onana fór í hitt hornið.

Fleiri urðu mörkin ekki og því fá bæði lið eitt stig út úr þessum leik. Einhvern veginn endaði þetta þannig að bæði lið horfa líklega á þetta sem tvö töpuð stig, hvorugt liðið getur verið sátt með þessi úrslit ef horft er á það hvernig leikurinn þróaðist.

Liverpool er nú í 2. sæti með 71 stig, jafnmörg stig og Arsenal sem er með betri markatölu. Manchester City er svo með stigi minna í 3. sætinu. Manchester United er áfram í 6. sæti og vonin um Meistaradeildarsæti að fjara út.