Auðunn var með rétt úrslit í 8 af 9 leikjum sem voru á dagskrá um helgina. Þar á meðal spáði hann hárrétt fyrir um 2-1 sigur sinna manna í Manchester United gegn Bournemouth og var með tvo markaskorara rétta.

„Þetta verður erfiður leikur fyrir mína menn. Bournemouth heitir og United alltaf einhvernveginn að taka eitt skref áfram en svo tvö til baka! En mínir menn hafa þetta 1-2. Martial setur allavega eitt og svo mætti Wilson lúðinn þarna setja fyrir hina, er með hann frammi í Fantasy," sagði Auddi í spá sinni en Martial og Wilson skoruðu báðir í leiknum.

Auddi var einnig með hárrétt úrslit í leik Cardiff og Leicester en síðarnefnda liðið vann 1-0. Eini leikurinn sem klikkaði var sigur West Ham á Burnley en þar var Auddi með jafntefli. Jafnt var í þeim leik fram á 84. mínútu.

Leikir helgarinnar
Bournemouth 1 - 2 Manchester United (Spá Audda 1-2)
Everton 3 - 1 Brighton (Spá Audda 2-0)
Cardiff 0 - 1 Leicester (Spá Audda 0-1)
Newcastle 1 - 0 Watford (Spá Audda 2-1)
West Ham 4 - 2 Burnley (Spá Audda 1-1)
Arsenal 1 - 1 Liverpool (Spá Audda 2-2)
Wolves 2 - 3 Tottenham (Spá Audda 0-1)
Manchester City 6 - 1 Southampton (Spá Audda 3-0)
Chelsea 3 - 1 Crystal Palace (Spá Audda 2-0)

Í kvöld fer fram síðasti leikurinn í 11. umferðinni en þar mætast Huddersfield og Fulham. Hér er spá Audda fyrir þann leik.

Huddersfield 1 - 1 Fulham
Held að ég sé einmitt að afþýða hakk þegar að þessi leikur er sýndur. Gæti ekki verið meira sama, en skjótum á 1-1.