Brewster er mikils metinn hjá Liverpool og skrifaði undir fimm ára samning við félagið síðasta sumar. Hann og Klopp eiga mjög gott samband og hefur þýski stjórinn lofað framherjanum plássi í leikmannahópi Liverpool.

„Þetta hefur verið mjög erfitt fyrir mig, ég óska engum þess að vera svona lengi frá vegna meiðsla. Núna er ég loksins kominn aftur í gang og ætla að gera mitt besta til að komast í aðalliðið," sagði Brewster.

„Það hefði verið auðvelt fyrir félagið að senda mig í endurhæfingu hjá unglingaliðinu en stjórinn talaði við mig og sagði að ég væri í áformum hans með aðalliðinu. Þess vegna fór ég í endurhæfingu hjá aðalliðinu og er óendanlega þakklátur.

„Ástin sem ég hef fundið fyrir meðan ég er meiddur er ómetanleg. Ekki bara hjá stjóranum heldur líka starfsmönnum og samherjum. Ég stend í þakkarskuld við Liverpool og get ekki beðið eftir að skora mörk fyrir félagið."

Brewster er fæddur 1. apríl árið 2000 og þykir gífurlega efnilegur, enda hefur hann skorað 24 mörk í 27 leikjum með yngri landsliðum Englands.

„Ég vil sanna fyrir öllum að það er ástæða fyrir því að stjórinn hefur haft trú á mér í gegnum meiðslin. Ég vil sanna að ég er nógu góður fyrir aðalliðið."

Nokkuð ljóst er að það verður erfitt fyrir Brewster að komast inn í byrjunarlið Liverpool þar sem sóknarmenn á borð við Daniel Sturridge og Divock Origi komast aðeins á bekkinn.