Lestu um leikinn: Víkingur R. 1 -  0 ÍA

„Þetta var mjög erfiður leikur í fæðingu. Skaginn kom með mjög beinskeitt "gameplan". Mér fannst á tímabili eins og við gætum spilað til hádegis á morgun og ekki náð inn marki. Þetta var mjög ljúft og mjög mikilvægt mark. Ég held að fólk geri sér ekki grein fyrir hversu mikilvægt mark þetta var og mikilvægur sigur, því okkur er búið að ganga illa á móti liðunum fyrir neðan okkur. Sumarið heldur áfram," sagði Arnar við Fótbolta.net eftir leikinn. Hann viðurkennir að hann hefði orðið ansi svekktur með einungis eitt stig úr leiknum, enda voru hans menn talsvert sterkari aðilinn.

„Ég hef verið ánægður með sum jafntefli í sumar en þetta hefði ekki verið eitt af þeim. Við vorum töluvert betri aðilinn í leiknum og ég held að enginn geti horft framhjá því."

Vítaspyrnudómurinn í uppbótartíma, sem Nikolaj Hansen nýtti til að skora sigurmarkið, vakti litla kátínu meðal Skagamanna, en Helgi Mikael virtist fyrst ekki dæma víti en skipti síðan um skoðun nokkrum sekúndum seinna.

„Sem betur fer eigum við Nikolaj nokkurn Hansen og hann var ískaldur á vítapunktinum," sagði Arnar, sem skilur gremju Skagamanna.

„Ég hefði verið vel ósáttur líka en mér fannst Helgi Mikael vera í mjög góðri stöðu til að dæma. Ég á eftir að sjá þetta aftur, en mér fannst dómarinn vera í mjög góðri aðstöðu til að dæma vítið og það var mjög djarft hjá honum að dæma víti," sagði Arnar, sem minnist þess þegar Helgi Mikael rak þrjá leikmenn Víkings af velli í fyrrasumar gegn KR.

„Fyndið með söguna í fótboltanum, hann var örlagavaldur á tímabilinu í fyrra í KR leiknum fræga og vonandi verður hann örlagavaldur á þessu tímabili líka, á jákvæðari hátt, með þessu víti."

Viðtalið við Arnar má sjá í heild sinni hér að ofan. Þar staðfestir hann m.a. að Víkingur hafi gert tilboð í Birni Snæ Ingason, leikmann HK, og að hann vonist enn til að fá leikmanninn til liðs við sig ásamt frekari liðsstyrk fyrir titilbaráttuna.