„Þetta var geggjuð frammistaða og við gerðum það sem við lögðum upp með," sagði Diljá Ýr Zomers, leikmaður Íslands, eftir 3-0 sigur gegn Póllandi í fyrsta leik í undankeppni Evrópumótsins 2025.
Lestu um leikinn: Ísland 3 - 0 Pólland
Diljá átti sinn besta leik með íslenska landsliðinu en hún hefur verið að brillera með Leuven í Belgíu og er sjálfstraustið í botni.
„Það er alltaf geggjað að geta komið með góða frammistöðu inn í leiki og hjálpa liðinu með því. Ég er aðallega sátt með það að geta hjálpað liðinu."
Diljá skoraði annað mark Íslands eftir fyrirgjöf frá Sveindísi Jane Jónsdóttur.
„Ég gaf hann á Sveindísi og við náðum svo einhverju augnsambandi. Hún gaf hann inn í og ég réðst bara á boltann. Ég var búin að segja við Söndru Maríu (Jessen) fyrir leikinn að ég ætlaði að skora skallamark. Það var skrifað í skýin."
„Ég er ekki frá því að þetta hafi verið minn besti landsleikur," sagði Diljá. „Sjálfstraustið gæti ábyggilega verið hærra. Ég er kröfuhörð á sjálfa mig. Það er allt annað þegar maður kemur hingað inn. Maður skilur annað eftir úti sem maður er að gera hjá félagsliði. Það er geggjað samt að geta skilað því sama hér."
Hægt er að sjá viðtalið í heild sinni hér að ofan.
Athugasemdir