Fjölnir sótti KR heim í kvöld og gerði markalaust jafntefli í 16. umferð Pepsí-deildar karla. Almarr Ormarsson leikmaður Fjölnis var ánægður með leikinn og sagði miklu meiri baráttu í liðinu í dag en hefur verið í sumar.
Lestu um leikinn: KR 0 - 0 Fjölnir
„Mér fannst við spila þennan leik bara nokkuð vel, eiginlega alveg eins og við lögðum upp með leikinn. Það var miklu betri barátta í dag en í flestum leikjum í sumar og jákvætt að halda hreinu annan leikinn í röð."
Almarr fékk lang besta færi leiksins og var ósáttur við sjálfan sig að nýta ekki færin sín í dag.
„Ég er pínu pirraður út í sjálfan mig, ég fæ tvö góð færi og ég á að nýta þau. Ef ég rifja þetta upp í fljótu bragði þá man ég eftir nokkrum sköllum frá þeim, ég fæ nátturulega lang besta færi leiksins, Ægir fær fínt færi og við fáum hættulegri færi en heilt yfir var þetta jafn leikur."
Ægir Jarl var framherji í dag, hann er venjulega á miðjunni með Almarri en Almarr sagði samstarf miðjumanna og Ægis frammi hafi gengið nákvæmlega eins og þeir lögðu upp með.
„Við vorum í raun bara þrír á miðjunni, ég, Igor og Anton og við vorum að tengja vel saman og Ægir var duglegur fyrir framan okkur þannig að hann auðveldaði okkur starfið. Þetta gekk bara eins og við ætluðum okkur."
Athugasemdir