Það er ekki úr vegi að nýtt lið á Íslandsmótinu ríði á vaðið í "Hvað er að frétta?" í ár. Draupnir frá Akureyri er félag sem var stofnað síðastliðið haust og mun leika í 3.deild karla í sumar.

Jón Stefán Jónsson leikmaður framkvæmdastjóri liðsins svaraði nokkrum spurningum.

Hvernig er stemningin hjá Draupni þessa dagana?
Stemmningin hjá okkur þessa dagana er góð að vanda enda er þetta lið stofnað til að búa til skemmtilega stemmningu og hafa gaman af því að spila fótbolta. Við strákanir höfum æft saman síðan í desember en nú nýlega var verið að stofna kvennalið hjá okkur sem mun vonandi taka þátt í 1. deild kvenna í sumar. Þegar þetta er er það þó ekki komið í ljós ennþá en vonandi gengur það í gegn.

Hvernig er liðið skipað?
Karlaliðið er skipað leikmönnum sem hafa eins ólíkan bakgrunn knattspyrnulega eins og er hægt að hugsa sér. Sumir leikmanna okkar hafa aldrei spilað 11 manna fóbolta á meðan að t.d. spilandi þjálfarinn okkar hann Hlynur hefur leikið sem atvinnumaður erlendis og með A-landsliði Íslands. Aldursmunurinn er einnig mikill, sá yngsti er fæddur 1992 en þeir elstu 1968. Þetta er því virkilega skemmtileg flóra leikmanna og verður spennandi að sjá hvernig okkur tekst að hrista þetta saman fyrir sumarið.

Er enginn rígur á milli KA manna og Þórsara í hópnum?
Nei í rauninni ekki, við erum í það minnsta ekki farnir að skipta í Þórsara á móti KA- mönnum á æfingum. Það myndi líka sennilega bara enda illa fyrir KA-helming liðsins þannig að það er best að sleppa því bara! Nei svona að öllu gamni slepptu þá eru menn voðalega lítið að ræða um smærri félögin hér í bæ innan raða Draupnis því við erum okkar eigið lið og ætlum að vera samstilltir samkvæmt því.

Hvar mun liðið leika heimaleiki sína í sumar?
Án þess að það sé alveg öruggt þá þykir mér líklegt að Boginn verði heimavöllur okkar í sumar. Við viljum auðvitað spila heimaleiki okkar utandyra á náttúrulegu grasi en það gæti reynst þrautinni þyngra að fá leiki á svæðum Þórs og KA. Þórsarar eru nú að ljúka framkvæmdum á sínu svæði og það kemur til með að þurfa sumarið til að verða gott. KA-menn misstu hluta aðalvallar síns þegar átti að hefjast handa við framkvæmdir þar, sem síðar var hætt við. Við sjáum hins vegar hvað setur, það er alls ekki útilokað að við getum spilað eitthvað utandyra þegar vel viðrar.

Vantaði "þriðja liðið" á Akureyri í fyrra?
Ég er þeirrar skoðunar að það sé nauðsynlegt að til sé lið á borð við Draupni hér í bæ. Þá er ég að tala um bæði karla- og kvennaknattspyrnu. Til er hellingur af knattspyrnufólki sem vill spila og keppa reglulega en hefur ekki tök á að æfa 5-6 sinnum í viku og spila í 22 leikja deild. Svarið er því já, það hefur vantað lið frá því að Hamrarnir og Vinir fluttu sig suður.

Hvernig hefur undirbúningstímabilinu hjá ykkur verið háttað?
Stelpurnar eru rétt að komast af stað en hvað okkur strákana varðar þá hófst undirbúningstímabil okkar í byrjun desember. Þá æfðum við 2-3 sinnum í viku í Boganum fram að jólafríi. Í janúar tókum við svo þátt í Soccerademótinu og spiluðum því einn leik í viku ásamt því að æfa 2 x í viku. Eftir að Soccerademótinu lauk höfum við verið að æfa 2-3 sinnum í viku og reynt að spila æfingaleiki eftir því sem þeir gefast. Fram að sumri ætlum við að reyna að spila mikið af æfingaleikjum og vera duglegir að æfa þess í milli enda ekkert gaman að spila fótbolta ef maður getur ekki hlaupið nema í 10 mínútur.

Ertu sáttur við spilamennsku liðsins í æfingaleikjum til þessa?
Ég er mjög sáttur við stígandan sem hefur verið í leik liðsins. Í Soccerademótinu fengum við skell í fyrsta leik en eftir hann spiluðum við betur og betur eftir því sem á leið. Við náðum því miður ekki að innbyrða stig í riðlakeppninni en gerðum svo jafntefli við KS/Leiftur í leik um 9. sætið á mótinu.
Spilamennska liðsins hefur sem sagt farið batnandi og ég er sáttur við hana, sérstaklega ef tekið er mið að af því að nánast engir okkar höfðu verið samherjar áður en við mynduðum þetta lið. Það tekur tíma að mynda lið en ég hef engar áhyggjur af öðru en að við verðum búnir að mynda samkeppnishæft lið fyrir sumarið.

Hver eru markmið ykkar fyrir sumarið?
Markmið okkar eru skýr, við ætlum aldrei að eiga í vandræðum með að manna hóp fyrir útileiki og við ætlum að vera samkeppnishæfir í öllum leikjum. Við ætlum okkur að gera þetta eins og alvöru klúbbur. Hvað varðar árangur á vellinum þá rennum við voðalega blint í sjóinn, ég persónulega væri mjög sáttur við að enda í 3-4 sæti í þessum sex liða riðli en hvort það er raunhæft hef ég ekki hugmynd um.

Hvaða lið telur þú að sé sigurstranglegast í 3. deildinni í sumar?
Nú verð ég að viðurkenna að ég þekki voðalega lítið til liðanna fyrir sunnan en það veit ég að norður- austurriðilinn hefur sjaldan verið skipaður jafn sterkum liðum eins og Dalvík/Reynir og Völsungur eru nú. Það kæmi mér mjög á óvart ef þessi lið færu ekki upp úr okkar riðli og þau verða klárlega mjög erfið heim að sækja í úrslitakeppninni. Dalvík/Reynir hefur á að skipta frábærum leikmanna hóp og eru með leikmenn sem hafa reynslu úr úrvalsdeild, má þar nefna Jóhann Hreiðarsson, Hermann Albertsson, Sigurð Sæberg Þorsteinsson og gamla manninn Jón Örvar Eiríksson. Völsungur hefur aftur á móti ekki jafn „stór” nöfn en eiga helling af virkilega efnilegum og sprækum strákum sem spila góðan fótbolta. Ekki vantar hæfileikana í þessi lið og ef leikmenn þeirra verða með toppstykkið rétt skrúfað á í leikjum sumarsins fara þessi lið sennilega bæði tvö alla leið í úrslit.

Eitthvað að lokum?
Með stofnun Draupnis er ekki ætlunin að tjalda til einnar nætur heldur viljum við að þetta lið verði framtíðar lið á Akureyri sem veitir þeim sem ekki geta/vilja komast að hjá Þór, KA eða Þór/KA (kvennaliðið) tækifæri til að spila. Ég vil því hvetja knattspyrnuáhugamenn og knattspyrnuforystuna á Akureyri til að sýna Draupni jákvætt viðmót. Liðið er mikilvægur hlekkur í knattspyrnuflórunni á Akureyri, mikilvægari en margir halda. Vonandi verður stuðningur við liðið mikill og góður í sumar, sjáumst á vellinum!