Sarri er mjög athyglisverður persónuleiki en hann hefur komið sér í fréttirnar fyrir það að tyggja sígarettustubba á hliðarlínunni. Sarri má ekki reykja á hliðarlínunni á Englandi og reynir því að finna aðrar leiðir til að komast hjá því.

Sarri er líka mjög hjátrúafullur en Jorginho, sem spilað hefur fyrir Sarri hjá Napoli og Chelsea, veit allt um það.

„Ef ég þyrfti að telja upp allt sem Sarri gerir þá væri ég hérna þangað til í fyrramálið," sagði Jorginho í samtali við Sky Sports á Ítalíu aðspurður út í það hvort Sarri væri hjátrúafullur.

„Ég skal segja ykkur eitt. Ef boltinn fer út af í innkast þá gerir hann allt til þess að komast hjá því að snerta hann. Ég tek það þó að ef leikstíl hans er fylgt þá mun boltinn ekki fara oft út af."

Saga Sarri er áhugaverð en hann vann lengi vel í banka til þess að geta haldið áfram að þjálfa.

Hér að neðan má sjá skemmtilegt myndband þar sem fjallað er feril Sarri hingað til.