Það var hörku viðureign í hádeginu í dag í Championship deildinni þegar toppliðið Fulham fékk Huddersfield í heimsókn.

Fulham er í góðum málum og ef ekkert óvænt gerist þá mun liðið leika í ensku úrvalsdeildinni á næstu leiktíð. Gestirnir frá Huddersfield eru hins vegar í hörku baráttu og eru sem stendur í umspilssæti.

Gestirnir byrjuðu betur og leiddu með tveimur mörkum í hálfleik. Danny Ward gerði fyrra markið og Duane Holmes tvöfaldaði forystuna á markamínútunni með marki af vítapunktinum.

Bobby Reid náði að minnka muninn fyrir Fulham en það var alltof lítið og alltof seint.

Huddersfield er í fjórða sætinu með 54 stig en Fulham er með tíu stigum meira, í því fyrsta.