„Við vorum í smá vandræðum með boltann í byrjun en eftir það náðum við ágætis tökum á leiknum. Við spiluðum virkilega vel á löngum köflum í fyrri hálfleik. Við komumst sanngjarnt yfir en seinni hálfleikurinn var okkur ekki til framdráttar," sagði þjálfari Vals, Heimir Guðjónsson eftir 4-0 sigur liðsins á HK í Kórnum í kvöld.
Patrick Pedersen var kominn með þrennu eftir hálftíma leik og þá var gott sem leik lokið. Heimir var hinsvegar langt í frá að vera ánægður með leik liðsins í seinni hálfleiknum. Þar voru Valsmenn manni fleiri en voru lengi í gang.
Patrick Pedersen var kominn með þrennu eftir hálftíma leik og þá var gott sem leik lokið. Heimir var hinsvegar langt í frá að vera ánægður með leik liðsins í seinni hálfleiknum. Þar voru Valsmenn manni fleiri en voru lengi í gang.
Lestu um leikinn: HK 0 - 4 Valur
„Við vorum of mikið að spila boltanum til baka og of hægt. Það var engin ástæða til þess að hætta að gera það sem við vorum að gera vel í fyrri hálfleik. En við gerðum það en það jákvæða er að þetta var sanngjarn sigur," sagði Heimir en var hálfleiksræða þjálfarans ekki að skila því sem hún átti að gera?
„Klárlega ekki, ég þarf að fara bæta mig," sagði Heimir léttur í svörum.
Sveinn Sigurður varamarkvörður Vals var ekki í leikmannahópnum í kvöld. Heimir staðfesti að ástæðan væri sú að hann væri kominn í sóttkví vegna Covid-19. Hann segir að hann verði í sóttkví næstu tólf dagana og missi því af næsta leik Vals einnig.
Félagaskiptaglugginn lokar um mánaðarmótin. Heimir segir að engar breytingar verði gerðar á leikmannahópi Vals fyrir þann tíma. Sögusagnir hafa verið uppi um að Valur hafi reynt að fá Nikolaj Hansen frá Víkingi Reykjavík í skiptum fyrir Kristin Frey Sigurðsson. Heimir var spurður út í þær sögusagnir.
„Það er ekkert til í því," sagði stuttorður Heimir Guðjónsson að lokum.
Athugasemdir