Arsenal vann sannfærandi 3-0 sigur á Brighton á Amex-leikvanginum í Brighton í ensku úrvalsdeildinni í kvöld. Lundúnaliðið er því komið aftur á toppinn með 71 stig, einu meira en Liverpool.

Brighton hefur verið eitt erfiðasta liðið heim að sækja á þessari leiktíð og hafði aðeins tapað einum heimaleik fyrir þennan leik en það var gegn West Ham í byrjun tímabils.

Þessi tölfræði hræddi ekki Mikel Arteta og hans menn en það þurfti örlitla þolinmæði til þess að ná forystunni.

Bukayo Saka gerði fyrsta markið á 33. mínútu úr vítaspyrnu eftir að Tariq Lamptey tæklaði Gabriel Jesus í teignum. VAR þurfti að skoða atvikið vel og vandlega, en brotið gerðist við enda vítateigsins og var óvíst hvort Jesus hafi verið kominn inn í teig þegar brotið átti sér stað og þá var einnig athugað hvort Lamptey hafi náð fyrst til boltans. VAR ákvað að Arsenal fengi vítaspyrnu og kom Saka því gestunum í 1-0.

Arsenal var hættulegra liðið í fyrri hálfleiknum og kom sér oft í góðar stöður en mörkin urðu hins vegar ekki fleiri áður en flautað var til loka fyrri hálfleiks.

Gabriel Jesus skallaði boltanum rétt framhjá í byrjun síðari hálfleiks. Arsenal var í leit að öðru marki enda getur 1-0 forystan verið hættuleg þegar líður á leikinn.

Annað markið kom fyrir rest. Jorginho setti boltann á Kai Havertz sem tvöfaldaði forystuna.

Leandro Trossard gerði þriðja og seinasta mark leiksins er hann lyfti boltanum yfir Bart Verbruggen í markinu. Gott mark gegn gömlu liðsfélögunum.

Sannfærandi og sanngjarnt hjá Arsenal, sem virðist hafa tekið slæma fallið í titilbaráttunni á síðasta tímabili í reynslubankann, en Arsenal er nú á toppnum með 71 stig þegar liðið á sjö leiki eftir í deildinni. Brighton er á meðan í 10. sæti með 43 stig.