KR lenti tveimur mörkum undir í Fífunni en kom til baka í síðari hálfleik og náði að jafna leikinn. Því var gripið til vítaspyrnukeppni sem virtist engan endi ætla að taka og lauk með 8-9 sigri KR.

„Við snerum leiknum við eftir að hafa verið undir og ég er mjög ánægður með að við skildum hafa unnið þetta síðan í vítakeppninni," sagði Rúnar við Fótbolta.net að leikslokum.

„Þetta voru mjög góð víti og kannski ekki mikið við markmennina að sakast. Það voru held ég tíu víti tekin þarna, það var alveg að koma að okkur á bekknum. Við vorum að velta því fyrir okkur hvort Beitir myndi þurfa að taka víti."

Rúnar hrósaði Bose-mótinu í hástert og talaði um Theódór Elmar Bjarnason sem spilaði með KR í mótinu og gæti verið á leið til félagsins.

„Ef við verðum svo heppnir að landa honum og fá að halda honum hér í KR þá er gott að hann sé búinn að kynnast aðeins strákunum. Hann fær að sjá fyrir hvað við stöndum og hvað við erum að gera. Það vonandi vekur hans áhuga á því að vera hjá okkur áfram.

„Hann vill vera hjá okkur en auðvitað skilur maður það mjög vel að hann er bara 31 árs og á nóg eftir. Auðvitað vill hann vera erlendis og spila fótbolta, ég skil það vel."

Rúnar bætti því við að KR sé ekki að leita að nýjum leikmönnum og að koma Elmars til félagsins væri bónus.