Flautað verður til leiks í Bestu deildinni á laugardaginn og spennan fyrir deildinni hefur sjaldan verið eins mikil. Mörg félög ætla sér stóra hluti og fjölmargir öflugir leikmenn eru í deildinni.
Gæðin í erlendu leikmönnunum hafa sjaldan verið eins mikil og hægara sagt en gert að setja saman lista yfir bestu útlendingana í deildinni.
Gæðin í erlendu leikmönnunum hafa sjaldan verið eins mikil og hægara sagt en gert að setja saman lista yfir bestu útlendingana í deildinni.
En samt sem áður þá kastar Fótbolti.net sér í djúpu laugina og setur hér saman topplista yfir erlenda leikmenn í deildinni. Allt til gamans gert (og nei við flokkum Aron Jóhannsson ekki sem útlending).
Við áskiljum okkur rétt til að endurskoða listann þegar deildin er komin vel af stað og stefnum þá að birta nýjan lista!
10. William Eskelinen (Vestri) - Ísfirðingar sóttu Svía sem hefur verið aðalmarkvörður Örebro í sænsku B-deildinni undanfarin tvö ár. Ætti að vera einn besti markvörður deildarinnar í sumar. Vestri er með fleiri öfluga erlenda leikmenn sem eiga eftir að skapa sér nafn í Bestu deildinni og bönkuðu á dyrnar á þessum lista.
9. Rodri (KA) - Einn besti erlendi leikmaður deildarinnar undanfarin ár. Þessi 34 ára Spánverji hefur verið mikilvægur hlekkur á miðsvæðinu.
8. Benjamin Stokke (Breiðablik) - Norski framherjinn ætti mögulega að vera ofar á listanum. Hreinræktuð 'nía' sem hefur skorað 73 mörk í tveimur efstu deildunum í Noregi.
7. Patrik Johannesen (Breiðablik) - Færeyingurinn lék afar vel fyrir Keflavík og er nú að snúa til baka eftir erfið meiðsli. Miklar vonir eru bundnar til Færeyingsins í Kópavoginum.
6. Fred (Fram) - Það eru fáir leikmenn skemmtilegri áhorfs en brasilíski töframaðurinn þegar hann er í stuði.
5. Oliver Ekroth (Víkingur) - Sænski varnarmaðurinn er sem klettur í vörn Víkings og var einn besti leikmaður Bestu deildarinnar í fyrra.
4. Nikolaj Hansen (Víkingur) - Danski fyrirliðinn er algjör lykilhlekkur í sóknarleik Víkings. Skoraði tólf mörk í Bestu deildinni í fyrra.
3. Gunnar Vatnhamar (Víkingur) - Færeyski landsliðsmaðurinn passaði ótrúlega vel inn í Víkingsliðið, getur brugðið sér í allra kvikinda líki og var einn besti leikmaður Íslandsmótsins í fyrra.
2. Pablo Punyed (Víkingur) - Enn einn Víkingurinn. Pablo hefur verið hér svo lengi að maður hugsar ekki um hann sem erlendan leikmann lengur. Þessi landsliðsmaður El Salvador er sannur sigurvegari sem gerir allt til að vinna. Óþolandi að spila á móti en geggjað að vera með í liði.
1. Patrick Pedersen (Valur) - 'Vi har Pedersen' syngja stuðningsmenn Vals, skiljanlega hæstánægðir með að hafa danska markaskorarann í sínum röðum. Pedersen hefur raðað inn mörkum fyrir Hlíðarendafélagið og fáir sem þora að veðja gegn því að hann taki gullskóinn í sumar og komist á topp lista yfir erlenda leikmenn sem hafa skorað og lagt upp flest mörk í íslensku deildinni.
Athugasemdir