Nýkrýndir meistarar Manchester City blésu til veislu á Etihad-vellinum í dag. Þeir mættu Svönunum frá Wales og spiluðu eins og sönnum Englandsmeisturum sæmir.

David Silva kom City yfir á 12. mínútu og stuttu síðar var Raheem Sterling búinn að bæta við öðru marki. Sterling er kominn með 18 mörk í ensku úrvalsdeildinni en það er tvöfalt meira en fyrrum besti árangur hans í markaskorun í deildinni. Hann skoraði níu mörk fyrir Liverpool þegar liðið vann næstum því deildina árið 2014.

18 - Raheem Sterling has scored 18 goals in the Premier League this season; twice as many as he did in his previous best campaign (9 for Liverpool in 2013/14). Evolution. pic.twitter.com/clTFiVqWQ4

— OptaJoe (@OptaJoe) April 22, 2018

Sett í næsta gír í seinni hálfleik
En aftur að leiknum. Staðan var 2-0 í hálfleik fyrir City en ef eitthvað er, þá gáfu þeir bara í þegar í seinni hálfleikinn var komið. Kevin de Bruyne, sem er í baráttu við Mo Salah um að vera besti leikmaður deildarinnar á þessu tímabili, bætti við þriðja markinu áður en Bernardo Silva gerði það fjórða.

Gabriel Jesus rak svo síðasta smiðshöggið á 88. mínútu og lokatölurnar í Manchester, Man City fimm, Swansea núll.

City heldur í 16 stiga forskot sitt á Manchester United en Swansea-menn eru ekki búnir að forða sér frá falli. Swansea er í 17. sæti deildarinnar, fjórum stigum frá fallsæti.

City mun taka á móti bikarnum 6. maí.