Hólmar Örn Eyjólfsson leikmaður West Ham hefur yfirgefið herbúðir félagsins en þetta staðfesti hann á Twitter síðu sinni í kvöld.
Hólmar gekk í raðir West Ham frá HK árið 2008 en hefur ekki spilað leik með aðalliði félagsins.
Hann fór á tíma sínum hjá West Ham á lán til Roeselare í Belgíu og Cheltenham í neðri deildum á Englandi.
Hann er lykilmaður í U21 árs landsliði Íslands þar sem faðir hans, Eyjólfur Sverrisson stýrir liðinu.
,,Ég er farinn, ég veit ekki hvert ég fer," sagði Hólmar á Twitter síðu sinni.
,,Takk fyrir öll góðu skilaboðin, ég kann virkilega að meta þau."
Óljóst er hvert Hólmar fer en samkvæmt heimildum Fótbolta.net er OB í Danmörku eitt þeirra liða sem hafa áhuga á að fá hann í sínar raðir.
