Bayer Leverkusen mun spila til úrslita í þýska bikarnum en þetta varð ljóst eftir 4-0 sigur liðsins á Fortuna Düsseldorf í kvöld.

Leverkusen er að eiga eftirminnilegt tímabil í Þýskalandi. Liðið hefur ekki enn tapað leik á tímabilinu og það ætlaði ekki að fara byrja á því í kvöld.

Jeremie Frimpong og Amine Adli komu liðinu í tveggja marka forystu á fyrstu tuttugu mínútum leiksins áður en sóknartengiliðurinn magnaði, Florian Wirtz, gerði þriðja markið tíu mínútum fyrir lok fyrri hálfleks.

Wirtz gerði endanlega út um leikinn með öðru marki sínu á 60. mínútu en það gerði hann úr vítaspyrnu.

Íslenski landsliðsmaðurinn Ísak Bergmann Jóhannesson spilaði allan leikinn á miðsvæðinu hjá Düsseldorf, sem er úr leik í bikarnum.

Leverkusen mætir B-deildarliði Kaiserslautern í úrslitum 25. maí næstkomandi. Leverkusen hefur aðeins unnið bikarinn einu sinni, árið 1993, en þetta er aðeins í fimmta sinn sem liðið kemst í úrslit.