Vinstri bakvörðurinn Guðmundur Þórarinsson lagði upp þriðja mark OFI Crete í 4-0 sigri liðsins á GIannina í fallriðli grísku úrvalsdeildarinnar í dag.
Guðmundur, sem hefur náð að festa sig í sessi í íslenska landsliðinu í síðustu leikjum, var í byrjunarliði Crete í dag.
Hann lagði upp þriðja mark liðsins fyrir belgíska sóknarmanninn Aaron Iseka Leya þegar um hálftími var eftir.
Þetta var önnur stoðsending hans í deildinni á þessu tímabili, en hann er einnig með tvö mörk.
Crete er í 10. sæti deildarinnar með 30 stig, sex stigum frá fallsæti.
Jón Dagur Þorsteinsson var í byrjunarliði Leuven sem gerði markalaust jafntefli við Standard Liege í Evrópuriðli belgísku úrvalsdeildarinnar. Leuven er með 16 stig í 5. sæti riðilsins.
Patrik Sigurður Gunnarsson stóð í marki Viking sem tapaði fyrir Bodö/Glimt í annarri umferð norsku úrvalsdeildarinnar í dag. Viking er með þrjú stig en Bodö/Glimt með fullt hús stiga.
Arnór Ingvi Traustason og Ísak Andri Sigurgeirsson voru í hópnum hjá Norrköping sem fékk óvæntan 3-0 skell gegn Mjällby í annarri umferð sænsku úrvalsdeildarinnar.
Arnór Ingvi var í byrjunarliði Norrköping en Ísak Andri, sem skoraði í fyrstu umferðini, sat allan tímann á varamannabekknum í dag. Norrköping er á botninum og án stiga eftir tvo leiki.
Athugasemdir