Brasilíski vængmaðurinn Felipe Anderson skoraði tvö er Lazio vann Salernitana 4-1 í Seríu A á Ítalíu í kvöld.

Anderson hefur ekki verið neitt svakalega iðinn við kolann á þessu tímabili.

Fyrir leikinn hafði hann aðeins skorað þrjú deildarmörk. Sá er ákveðinn í að kveðja Lazio með stæl en hann er sagður á leið til Juventus eftir þessa leiktíð.

Brasilíumaðurinn skoraði fyrsta mark sitt á 7. mínútu áður en Matias Vecino tvöfaldaði forystuna sjö mínútum síðar. Loum Tchaouna svaraði strax fyrir Salernitana en Anderson sá til þess að koma Lazio aftur í tveggja marka forystu þegar tíu mínútur voru eftir af fyrri hálfleiknum.

Gustav Isaksen gerði fjórða og síðasta mark Lazio í leiknum en liðið er nú í 7. sæti með 49 stig, einu stigi frá Atalanta sem er í Evrópusæti.