Hollendingurinn Denzel Dumfries er aðalmaðurinn í hægri bakvarðarstöðunni hjá Inter en samningur hans rennur út á næsta ári og er algerlega óvíst hvort hann geri nýjan samning.

Mörg félög eru að fylgjast með Dumfries sem er metinn á um 30 milljónir evra.

Talið er líklegt að hann verði seldur í sumar ef hann nær ekki samkomulagi um nýjan samning og vill Inter fá Wan-Bissaka frá Manchester United til að fylla í skarð Dumfries.

Gazzetta dello Sport segir að Inter sé reiðubúið að borga um 15 milljónir evra fyrir Wan-Bissaka, sem hefur aðeins byrjað þrettán deildarleiki með United á tímabilinu, verður líklega einn af þeim sem félagið ætlar að losa sig við í sumar.

Inter er ekki bara að skoða Wan-Bissaka fyrir sumargluggann en félagið er einnig áhugasamt um að fá íslenska landsliðsmanninn Albert Guðmundsson frá Genoa.

Albert er orðaður við öll stærstu félögin á Ítalíu en talið er að Inter sé að leiða baráttuna um hann. Genoa vill um 25-30 milljónir evra fyrir Albert, sem hefur skorað 12 deildarmörk á tímabilinu.